2009 թ. ավելի շատ հայ է ծնվել քան 2008թ.-ին

2009թ. Հայաստանում ծնված երեխաների թիվը կազմել է 43 հազ.` 2007-2008թթ. 40 հազ.-ի փոխարեն: ՀՀ առողջապահության նախարարության գլխավոր մանկաբարձ-գինեկոլոգ, պրոֆեսոր Ռազմիկ Աբրահամյանն այսօր հրավիրած ասուլիսում սա աննախադեպ ցուցանիշ անվանեց` նշելով, որ դրա համար երկրում ստեղծված են բոլոր նախադրյալները: «Ոչ մի երկրում ծննդօգնությունն ամբողջովին անվճար չէ, իսկ մեր երկրում ներդրված հավաստագրերի շնորհիվ հնարավոր եղավ ծնելիության աճ ապահովել»,- նշեց մասնագետը:

Ռ. Աբրահամյանը նաև ասաց, որ վերջին տարիներին Հայաստանում կտրուկ նվազել է արատներով ծնվող երեխաների թիվը` կազմելով 14-15 պրոմիլե: Սա նշանակում է, որ տարեկան 1000 նորածնից արատներով է ծնվում ընդամենը 1-2-ը: Մասնագետներն առողջ երեխաներ ցանկացող ծնողներին խորհուրդ են տալիս քիչ ծխել և քիչ ալկոհոլ օգտագործել, պարբերաբար բուժզննման ենթարկվել, քանի որ վիժումների մեծ մասը տարբեր սեռավարակների հետևանք են։

ԱՆ մոր և մանկան առողջության պահպանման բաժնի գլխավոր մասնագետ Գայանե Ավագյանն էլ նշեց, որ Հայաստանն այն եզակի երկրներից է, որտեղ ուշադրության կենտրոնում է պահվում կնոջ վերարտադրողական առողջությունը. 15 տարեկան բոլոր աղջիկները պետպատվերի շրջանակներում պարտադիր բուժզննման են ենթարկվում:

Հարցեր, պատասխաններ, մեկնաբանություններ